आर्थिक वर्ष २०८०–८१ को बजेटमार्फत आयकरको ‘स्ल्याब’ मा परिवर्तन गर्दै सरकार ,साउनदेखि लागू हुने
काठमाडौं । वार्षिक ६० लाख रुपैयाँमा करयोग्य आम्दानी छ भने अब तपाइँले सरकारलाई १८ लाख ५५ हजार कर तिर्नुपर्ने छ ।
आगामी आर्थिक वर्ष २०८०–८१ को बजेटमार्फत आयकरको ‘स्ल्याब’ मा परिवर्तन गर्दै सरकारले यस्तो व्यवस्था गरेको हो । बजेटमा गरिएको व्यवस्था अनुसार आयकर ऐनमा संशोधन गर्दै सरकारले ६० लाख रुपैयाँ करयोग्य आयमा एकल व्यक्तिको हकमा सो व्यवस्था गरेको हो । दम्पत्तिको हकमा भने उक्त बराबरको आयमा १८ लाख २६ हजार रुपैयाँ तिर्नुपर्ने छ । संशोधित आयकरको व्यवस्थामा मुख्यगरी आयका दुई वटा स्ल्याबमा परिवर्तन गरिएको छ । बाँकी स्ल्याबमा भने चालू आर्थिक वर्षकै व्यवस्था निरन्तर गरिएको छ ।
पुरानै निरन्तरता पाएकामा पाँच लाखसम्मको करयोग्य आयमा एकल व्यक्ति एक प्रतिशत अर्थात् पाँच हजार रुपैयाँ र दम्पत्तिको हकमा ६ लाख रुपैयाँसम्मको आम्दानीमा समान एक प्रतिशत अर्थात् ६ हजार रुपैयाँ आयकर तिर्नुपर्ने व्यवस्था छ । त्यस्तै पाँच लाखभन्दा बढी सात लाखसम्म वार्षिक आम्दानी गर्ने एकल व्यक्तिको १० प्रतिशत अर्थात् २० हजार रुपैयाँ र ६ लाखभन्दा बढी आठ लाखसम्म आम्दानी गर्ने दम्पत्तिको १० प्रतिशत अर्थात् अधिकतम २० हजार रुपैयाँ कर थप हुनेछ ।
सात लाखभन्दा बढी १० लाखसम्मको आम्दानी गर्ने एकल व्यक्तिले २० प्रतिशत अर्थात् अधिकतम ६० हजार रुपैयाँ कर थप गरेर तिर्नुपर्ने छ । आठ लाखभन्दा बढी ११ लाखसम्मको आम्दानीमा २० प्रतिशत अर्थात् अधिकतम ६० हजार रुपैयाँ कर थप गर्नुपर्ने छ । १० लाखभन्दा बढी २० लाखसम्मको आम्दानीमा एकल व्यक्तिले ३० प्रतिशत अर्थात् अधिकतम तीन लाख र ११ लाखभन्दा बढी २० लाखसम्म आम्दानी गर्ने दम्पत्तिको हकमा ३० प्रतिशत अर्थात् अधिकतम दुई लाख ७० हजार रुपैयाँ थप कर तिर्नुपर्ने छ ।
आगामी आर्थिक वर्षदेखि लागू हुने गरी दुई वटा करको स्ल्याब थप गरिएको छ । जसमध्ये २० लाखभन्दा ५० लाखसम्मको आम्दानीमा एकल व्यक्ति तथा दम्पत्तिले अधिकतम ३६ प्रतिशत अर्थात् अधिकतम १० लाख ८० हजार रुपैयाँ कर थप गरेर तिर्नुपर्ने छ । चालू आर्थिक वर्षमा २० लाखभन्दा बढी जुनसुकै भए पनि ३६ प्रतिशत कर बुझाउनुपर्ने व्यवस्था भए पनि सरकारले यसमा ५० लाख रुपैयाँसम्मको आम्दानी तोकेर अर्को स्ल्याब बनाएको हो ।
५० लाखभन्दा माथि जतिसुकै करयोग्य आय भएमा कुल ३९ प्रतिशत अर्थात् तीन लाख ९० हजार थप कर तिर्नुपर्ने छ । यसरी ३९ प्रतिशत करको दर निर्धारण गर्दा ३० प्रतिशत आयकर लाग्ने स्ल्याब अनुसार निर्धारण हुने करमा थप ३० प्रतिशत थप गरेर निर्धारण गरिएको छ । आयकरको यो संशोधन आगामी आर्थिक वर्ष अर्थात् साउनदेखि लागू हुनेछ ।
ट्रेण्डिङ समाचार
ताजा समाचार
-
१.
-
२.
-
३.
-
४.
-
५.
-
६.
-
७.
-
८.
-
९.
-
१०.
प्रतिक्रिया