जेष्ठ प्राध्यापक समाजद्वारा प्रा.डा. राणा सम्मानित
काठमाडौं । जेष्ठ प्राध्यापक समाजले बद्री–तीर्थ आरथ्राइटिस समाज तथा नेशनल बाथरोग सेन्टरसँग सहकार्य गर्दै योजना आयोगका पूर्व उपाध्यक्ष तथा नाष्टका पूर्व उपकुलपति प्रा.डा. रत्नशमशेर जबरालाई सम्मानित गरेको छ ।
सोमबार काठमाडौंमा सम्पन्न कार्यक्रममा समाजले प्रा.डा. जबरालाई ‘तीर्थानन्द वैद्य लाइफटाइम एचिभमेन्ट अवार्ड’ प्रदान गरेको हो । उक्त सम्मानकासाथ २५ हजार नगद राशि पनि प्रदान गरिएको छ ।
कार्यक्रममा बाथरोग जागरण अभियानको उद्घाटन तथा प्रा.डा. जबराको सम्मान गर्दै प्रमुख अतिथि काठमाडौं महानगरपालिका वडा नं. ९ का अध्यक्ष रामजी भण्डारीले वडाबाट स्वास्थ्य क्षेत्रमा सकेसम्मको सहयोग गर्ने बताए ।
उक्त अवसरमा जेष्ठ प्राध्यापक समाजका अध्यक्ष डा. विमलकुमार शर्माले प्रा.डा. राणाको क्रियाशीलताको चर्चा गर्दै यसअघि पनि तीन व्यक्तित्वलाई यो सम्मान अर्पण गरिसकेको बताए ।
डा. शर्माले बद्री तीर्थ आरथ्राइटिस समाजले यो अवसर जुटाइ दिएकोमा आभार व्यक्त गर्दै जेष्ठ प्राध्यापक समाजले पनि सदा सहयोग गर्ने उल्लेख गरे ।
समाजका महासचिव प्रा. सिद्धिप्रसाद कोइरालाले प्रा.डा. जबराको योगदानको चर्चा गर्दै उनको परिचय प्रस्तुत गरे ।
सम्मानित व्यक्तित्व प्रा.डा. जबराले सम्मानले यो उमेरमा पनि आफूमा उर्जा थपिएको बताए । उनले सम्मानकासाथ प्राप्त नगद राशि जेष्ठ प्राध्यापक समाजको अक्षयकोशमा जम्माहुनेगरि समाजका अध्यक्षलाई हस्तान्तरण गरे ।
सोही अवसरमा बद्री तीर्थ आरथ्राइटिस समाज र नेशनल बाथरोग सेन्टरको संयुक्त आयोजनामा बाथरोग जागरण अभियानको सुरु भएको छ ।
सोअवसरमा माघ ३ गतेदेखि एक हप्तासम्म रातोपुलस्थित सेन्टरमा बाथरोग सम्बन्धि निःशुल्क शिविर सञ्चालन गरिने जानकारी गराइएको छ ।
जागरण कार्यक्रमको उद्घाटनमा नशारोग विशेषज्ञ डा. दीपेश शाक्यले बाथरोग जटिल किसिमको रोग भएको र यो नशासँग पनि जोडिने भएकोले बाथरोगमा हेलचेक्राईं नगर्न सबैसँग आग्रह गरे । त्यस्तै डा. सुधीर कर्माचार्यले बद्री–तीर्थ आरथ्राइटिस समाजलाई धन्यवाद दिँदै संस्थाले उपत्यकाभित्र मात्र नभई मुलुकको कुनाकाप्चामा पुगेर पुगेर बाथरोगप्रति जनचेतना फैलाउने काममा विशेष जोड दिनुपर्ने उल्लेख गरे ।
निःशुल्क शिविरमा सहकार्य गर्दै आएको संस्था नेशनल बाथरोग सेन्टरका अध्यक्ष डा. विनीत वैद्यले हरेक क्षेत्रका व्यक्तिहरूले बाथरोगप्रति सचेत हुनुपर्ने बताए । उनले पछिल्ला अवधिमा आफूहरूले सूचना प्रविधिको प्रयोग गर्दै गाउँगाउँमा भ्याएसम्म बाथ रोगीहरूको पहिचान गर्दै आएको बताएका छन् । उनले यस किसिमका कार्यमा मिडियालगायत सबैको साथ र सहयोगको खाँचो रहेको बताए ।
सेन्टरका कार्यकारी निर्देशक रोशन कक्षपतिले बाथरोग नियन्त्रणका लागि सचेतनामूलक कार्यक्रम आवश्यक रहेकोले आफूहरूले जागरण अभियानसँगै निःशुल्क बाथरोग शिविर आयोजन गर्दै आएको बताए ।
कार्यक्रममा बद्री–तीर्थ आरथ्राइटिस समाजकी अध्यक्ष बद्रीलक्ष्मी वैद्यले संस्थाले गर्ने काममा सबैको साथ र सहयोगको अपेक्षा गरिन् । उक्त अवसरमा तिमिला थापा यमी, पवित्रा कार्कीलगायतले बोलेका थिए ।
ट्रेण्डिङ समाचार
ताजा समाचार
-
१.
-
२.
-
३.
-
४.
-
५.
-
६.
-
७.
-
८.
-
९.
-
१०.
प्रतिक्रिया